Nae Fae a Learned Pen

Sample Poems

MA FIRST DAY AT SQUEEL

page 9

Ma first day at squeel, I can min' on't richt weel
First ava it wis poorin' o' rain
As the watter rushed by I could hear masel cry
I wish I wis sweeled doon a drain

The idder bairns lookit me a' up an doon
An' fegs foo I felt it - bein an afa sma' loon
The quines they a tittered an' whispered tae ither
Ah foo I longed tae be hame wi' ma mither

We a steed in the play green I didna meeve far
I stuck tae ma brither like a steen sticks tae tar
An' fan the bell rang ma' hert nearly stoppit
An' oot o' ma heid ma een nearly poppit

The size o' the squeel - three great muckle rooms
I'd get tint - the thocht gaed ma belly great stoons
An' the seats, a' in raws like a park foo o' stooks
An' there on the table - a cairt load o' buicks

The Dominie cam' ben' a gurly like chiel
His fuskers wis reid, baith his een were as weel
He blinked thro' his glesses, gaed his mouser a dict
I could see that the mannie wintit athing jist richt

Fan denner time cam' the thocht crossed ma mind
Tae tak' tae ma heels an' leave 'athing behind
Sine a thocht on ma mither an' fut she wid dae
I kent fut it wis tae be laid ower her knee

So I swallowed ma' piece it wis syrup on bried
Sat doon in a neuk an' wished I wis deid
Noo a' efterneen I wis wintin tae greet
As I slid back an' fore on ma hard widden seat

I thocht that the day it wid never gang by
So I jist sat an' tholed it till 3.45,
The door it wis opened I could feel the fresh air
Wi' the lave o' the loons I wis aff like a hare
I niver eence stoppit, nor did I look roon
I wis oot o' the jile an' a free Little Loon.

Publisher

ISBN 0-9545315-0-7
© Scardogan 2003

All Rights Reserved

Published by Shanks Publishing (Banchory-Devenick)
Printed by David Winter & Son Limited